LA UNION – Agtultuloy nga im-imbestigaran ti Santol Police Station ti pannakatay ti maysa a 26-anyos a mannalon kalpasan a nagsagaba iti pannakauram iti ulo ken bagina gapu iti pannakakuriente daytoy iti nabaybay-an nga electric wire.
Binigbig ni SPO2 Marlon Panitan ti biktima a ni Denver Balad, baro a residente ti Brgy. Puguil.
Segun ken ni Panitan, naamuan a nagturong ni Balad iti pagmulaanda ti nateng iti taltalon pasado-alas-5:30 iti malem tapno koma mangala iti ladawan ti nakabitin a kable ti kuryente ti La Union Electric Cooperative (LUELCO) a nabayagen nga irekreklamoda ngem awan ti naiganwat nga aksion manipud iti kooperatiba.
Nupay kasta, nagdanag dagiti kabagianna idi saanen a nakaawid pay ket idi sapulenda, nasarakanda laengen a nakadasay daytoy iti igid ti kalsada a nauram ti ulona ken naduma-duma a paset ti bagi gapu iti pannakakuriente daytoy.
Kabayatanna, iti pannakiuman ken ni Brgy. Kapitan Randy Dangli ti Puguil, kinunana nga idi pay bulan ti Setiembre idi 2016 nga inreklamoda iti LUELCO ti natumba a poste ti kuriente gapu iti bagyo a Lawin.
Nupay kasta, binagbagaan ida ti kooperatiba a mangaramid pay laeng iti alternatibo a poste tapno agtultuloy ti panagdalyasat ti linya ti elektrisidad.
