LA UNION – Nasugatan ti maysa a mannalon kalpasan a nagputok ti napidotna a paltog kabayatan nga agturong koma daytoy idiay taltalon tapno agpastor kadagiti dengnguen idiay Barangay San Jose, ili ti Sudipen, La Union.
Nabigbig ti 31-anyos a biktima a ni Jessie Carino.
Iti pannakiuman ti Bombo Radyo kenni S/Ins. Juan Casem Jr., hepe ti Sudipen Police, kinunana nga ipaima koma ti biktima ti napidotna a paltog kadagiti opisyal ti barangay ngem killaat a nagputok daytoy kalpasan a nakalbit ti gatilyo.
Natirwan ti kannigid a luppo ti mannalon isu a naiturong daytoy iti ospital ken adda itan ti nasayaat a kasasaad kalpasan a nataming ti doktor.
Sigun kenni Casem, awan ti magazine ti nadakamat a paltog a maysa a cal .9mm ngem mabalin a loaded ti bala iti chamber daytoy.
Posible a maammuan kinunana ti makinkukua ti nadakamat nga igam gapu iti naikitikit a serial number daytoy.
