Inkari dagiti manufacturers ti basic necessities ken prime commodities (BNPCs) iti Department of Trade and Industry (DTI) a saanda nga ipangato ti presio iti uneg ti sumaruno a 30 aginggana 60 nga aldaw.
Karaman kadagiti produkto a saan nga aggaraw ti presiona ket dagiti de lata a sardinas, tinapay, instant noodles, kape, sabon, ken kandela, tapno mapalag-an iti epekto ti nangato a presio ti petroleo.
Pagtalinaeden dagiti 21 manufacturers iti agdama a Suggested Retail Price (SRP) dagiti kangrunaan a magatang ken commodities.
Segun kenni DTI Secretary Cristina Roque, ti panggepna ket tapno masalakniban dagiti konsumidor ta agbaliwbaliw ti presio dagiti produkto ti petroleo.
Nagpakdaar met ti ahensia kontra iti hoarding ken panagngato ti presio, ken innalukoy iti publiko nga ireportda daytoy iti ahensia.###
