Rinaba ni Committee Chairman Rodante Marcoleta ni Senador Jinggoy Estrada a ‘safe’ wenno natalged, kalpasan nga awan ti inraman ni Curlee Discaya a Senador nga addaan pakainaigan ken nagnumar kadagiti maanomalya a flood control projects.
Dagos met a nagkiddaw ni Estrada nga ikkaten ti opisyal a record iti nadakamat a waragawag kas panagraem iti formality ti panagdingeg.
Iti naangay a Blue Ribbon Committee Hearing, imbutaktak dagiti agasawa a Discaya dagiti karaman ti nalawa a korapsyon ti DPWH ken KAMARA.
Maipagarop a napilitan da a makipaset kadagiti anomalous bidding ken mangipaay ti kickback kadagiti sumagmamano nga opisyal kasukat ti proyekto.
Maibasar iti sinapataan da a testimonya, maipagarop a dumawdawat ti 10% agingana 25% commission dagiti innaganan da nga opisyal manipud iti balor ti proyekto.
Kangrunaan a nadakamat kadagiti transaksion ket ni Representative Elizaldy Co.###
