Insingasing ti Marcos administration iti ₱10.773 billion confidential and intelligence funds (CIF) iti sidong ti ₱7.2 trillion proposed budget para inton 2027, a nababbaba ti 8.8% no idilig iti ₱11.818 billion nga alokasion ita a tawen.
Iti nasao a singasing, ₱4.368 billion iti naitukon para iti confidential funds ken ₱6.405 billion para iti intelligence funds.
Segun kenni Acting Budget Secretary Kim Robert De Leon, makaawat laeng ti CIF dagiti ahensia nga autorisado a mangisayangkat ti confidential ken intelligence functions, ken maipasidong iti pannakausar daytoy iti agdama a pagannurotan iti budgeting, utilization, liquidation ken auditing tapno masigurado iti accountability.
Karaman pay iti gakat ti ₱111.98 billion nga unprogrammed appropriations (UA), a kangrunaan a nairanta para kadagiti foreign-assisted projects.
Segun ti Department of Budget and Management (DBM), dagiti nasao a pondo ket standby appropriations a mabalin nga usaren no matungpal dagiti sumagmamano a legal conditions, agraman ti kaadda ti kanayonan a birok wenno naaprobaran a pautang para kadagiti foreign-assisted projects.
Kabayatanna, kenuna ni House Committee on Appropriations Chairperson Mikaela Suansing a saanda nga ipalubos a mausar ti UA para kadagiti flood control projects ken nasken a mailatang kadagiti kasapulan a panaggastos.
Naituding a mangrugi iti deliberasion ti Kamara iti naisingasing a badyet inton Agosto 17.###
