Nagun-od ni Maris Racal iti umuna a major acting award iti karerana kalpasan a nangabak iti Best Lead Performance of 2025 iti 6th Pinoy Rebyu Awards, nga ipapaay ti Society of Filipino Film Reviewers.
Napadayawan ni Racal gapu iti panagakem na kas kangrunaan a karakter iti pelikula nga “Sunshine.”
Iti nadakamat a pelikula, inakem na iti papel ti maysa nga agtutubo a gymnast a sumangsango kadagiti nakaro a personal ken sosial a pannubok.
Iti social media account-na, inbinglay ti aktres iti ladawan bayat a nakaiggem iti tropeo ken nangiyegkas ti panagyaman iti Society of Filipino Film Reviewers.
Segun kenni Racal, naisangsangayan iti panangbigbig gapu ta daytoy ti umuna a major Best Actress wenno Best Lead Performance award-na iti industria.
Naglayos met ti kablaaw manipud kadagiti gagayyem, padana nga artista, ken fans a nangiyebkas ti suporta ken panangdayaw iti panagballigi na.###
