Maysa a Marvel Comics superfan manipud Britain iti nagpatattoo ti 63 a karakter iti bagina kas tribute kadagiti paboritona nga heroes ken villains.
Gapu ti daytoy, nagun-od ni Tom Radford, 40-anyos, iti Guinnes World Records para ti kaadduan a Marvel Comics characters a naitattoo iti maysa a bagi. Sakbayna ket sigud nga iggem ni Ryan Logsdon ken Rick Scolamiero iti titulo a 34 Marvel tattoos.
Ti umuna a Marvel tattoo ni Radford ket idi 2016 partikular iti luppona ken ti karakter a ni Thanos. Sipud idin ket nagtultuloyen iti panagpatattona.
Imbinglay na pay nga iti planona ket agpatattoo ti Marvel villains iti maysa a saka na bayat nga heroes met iti bangir, ngem naibusan daytoy ti espasio isu a naiwaras iti likod ken dadduma pay a paset ti bagi.
Addaan metten isuna ti perma ni Josh Brolin, a nangakem iti karakter a Thanos iti Marvel Cinematic Universe, ken ni Elizabeth Olsen, a nangakem iti Scarlet Witch.
Iti agdama, tarigagayna a manayunan pay dagiti perma iti panagdar-ayna iti San Diego Comic-Con.###
