LA UNION – Mangrugin a maipatungpal inton Lunes, Marso 8 agdama a tawen iti baro ken naluk-lukay itan nga allagaden para kadagiti bisita a sumrek ditoy La Union ken dagiti umili a rumuar nga agturong iti sabali a lugar.
Nakapauneg iti Executive Order No. 03-2021 nga impaulog ti Prov’l. Government of La Union a pinirmaan ni Governor Francisco Emmanuel “PACOY” Ortega III, a dagiti indibiduwal a sumrek ken rumwar ditoy probinsiya ket nasken nga addaan ti NAPANAM QR CODE.
Inlawlawag iti Bombo Radyo ni Provincial Information Officer Adamor Dagang, nga iti NAPANAM QR CODE ket maysa a contact tracing application ti La Union tapno nalaklaka a biroken iti tao a posible a naakaran iti COVID 19, ken wagas metten daytoy tapno makissayan iti panagusar ti papel babaen ti logbook, a maysa kadagiti posible a makagapo iti panagwaras ti virus.
Mabalin nga ag-rehistro via online babaen iti panag-log in iti website nga Napanam.launion.gov.ph, nasken a kumpleto iti impormasyon ken sungbatan amin a salodsod tapno nabibiit iti panangala iti nasao a QR code iti uneg ti 48 nga oras.
Segun kenni Dagang, iti NAPANAM QR CODE ket naiyuswat idi pay napalabas a tawen ken maus-usar metten daytoy iti merkado publiko ken iti sumagmamano a mall ditoy syudad.
Inlawlawag pay ni Dagang nga iti Napanam QR Code ket umanayen nga ipakita kadagiti otoridad nga agbanbantay iti border checkpoints nu naggapo iti low risk areas, kas koma dagiti lugar a nakapasidong iti MGCQ.
Ngem kasapolan a mangipakita iti negative nga RT PCR Test result iti maysa nga indibiduwal nu naggapo kadagiti high risk areas kas koma iti GCQ ken ECQ areas.
Kabayatanna, kinumpirma ni Dagang nga iti mabiit ket sumangpet metten ditoy probinsiya iti umuna a batch ti allocation iti covid 19 vaccine, a maipaay nga umuna kadagiti healthcare workers.
