Balligi a naglippas iti maikadua ken maudi nga aldaw ti Media Agkaysa Ronda idi kalman, Pebrero 20, 2026.
Pinatibker ti Provincial Government of La Union (PGLU) ti relasion da iti lokal ken national media babaen ti Media Immersion Activity nga indauluan ti Media Affairs Office.
Nasurok nga 60 a media practitioners iti nakipaset ti umuna nga aldaw ti programa a tarigagay a maitampok dagiti nagkakapintas a destinasion iti umuna a distrito ti La Union.
Addaan ti tema daitoy a “Media Agkaysa Ronda for Information Optimization,” ken nairangta a mangpapigsa iti panagtitinnulong ti PGLU, Lokal a Gobierno, ken dagiti kameng ti media.
Panggep na a papigsaen ti pannakaitandudo ti lokal a turismo, ipakita dagiti proyekto ti panagdur-as, ken maitandudo ti kinalawag ken nasayaat a panagturay.
Impeksa ti PGLU iti agtultuloy a panagkumit ti administrasion a makilangen iti media kas kangrunaan a katinnulong ti panangsuporta iti turismo ken lokal a panagdur-as. Agserserbi ti media a rangtay tapno maidanon iti publiko dagiti gundaway ken kinapintas ti tunggal ili iti La Union kangrunaan ti 1st District.
Iti maudi nga aldaw ti Ronda, simmarungkar dagiti nakipaset iti sumagmamano a destinasion a pakairamanan ti:
- SAN GABRIEL – Baroro Watershed, partikular idiay Sitio Kilat, Barang Bumbuneg
- Naipakita iti “Ballangbang” a welcome dance ken iti panagaramid ti buyboy ken panagusar ti gongs.
- SAN JUAN – St. John the Baptist ken ti Town Plaza
- BACNOTAN – Bacnotan Farmers Agri-Tourism Center idiay Barangay Baroro
-Masarakan dagiti produkto ti ili kas ti “diro” wenno honey, chicharon, silk weaving, ken dadduma. - SAN FERNANDO – Macho Temple, Seaport, ken Airport
Karaman kadagiti nakipaset ket dagiti 20 media practitioners ken 20 content creators manipud ditoy La Union, 10 media practitioners manipud Baguio, 10 media practitioners manipud Pangasinan.
Nangipaay iti aktibidad ti nalawlawa a perspektibo ken gundaway a mangitandudo kadagiti proyekto iti sektor ti turismo ti probinsia iti nalawlawa a panangiyam-ammo.
Mangnamnama ti PGLU ken dagiti lokal a gobierno a simmarungkar a babaen ti tulong ti media, ad-adda a maam-ammo dagiti tourist spots ken masuportaran dagiti lokal nga industria a mangyeg ti kanayonan a kita ken gundaway kadagiti umili bayat a maitandudo ti sustainable tourism development ti 1st District ti La Union.
