LA UNION – Legal iti operasyon ti Private Motor Vehicle Inspection Center (PMVIC) ditoy syudad ti San Fernando ken accredited ti nasao a negosyo iti sidong ti Land Transportation Office-(LTO).
Daytoy iti impaganetget ni San Fernando City Mayor Herminigildo ‘Dong’ Gualberto kabayatan ti impaayab na a press conference idi Enero 30, 2021.
Inlawlawag na a dagiti nasao nga ahensiya ti gobyerno iti addaan ti hurisdiksyon a mangsuspinde iti operasyon ti PMVIC ken awan met ti bileg a mang-revoke iti business permit nu awan ti legal a basaran, agsipudta isuna ti madaksan.
Inlawlawag pay ni Mayor Dong, nga iti insayangkat nga inspeksiyon ti City Local Economic and Business Dev’t Office nga idaulwan ni Ms. Rizalyn Medrano, awan ti nakita da a panaglabsing iti city ordinance partikular iti revenue code.
Segun iti Mayor, iti mandato na nu maipapan iti taray ti negosyo, ket kitaen nu lehitimo daytoy, nu addaan ti mayor’s permit, compliance iti revenue code ken compliance iti local ordinances, banag kunana a nasurot amin daytoy iti biang ti PMVIC.
Nupay kasta, kas sungbat iti panawagan dagiti motorista, a suspindiren iti operasyon ti PMVIC a nakabase iti Barangay Lingsat, kinuna ti local chief executive a binilin na iti City Administrator ken City Legal Officer, a mangaramid ti surat a maipatulod iti DOTr ken Land Transportation Office (LTO) Central office, para iti kadawatan a suspension iti PMVIC operation ditoy syudad.
Daytoy ket tapno maipaayan da iti naan-anay a panawen tapno adalen nu kasatnu nga ibaba iti rate ti singir iti inspection, nga isuti kangrunaan nga irek-reklamo dagiti motorista.
Kabayatanna, kinumpirma ni Mayor Gualberto a cabagyan na iti mangiman-manehar iti PMVIC ditoy syudad.
Ngem kinunana nga awan ti makita na a biddut ditoy wenno panaglabsing, agsipudta iti negosyo ket para iti amin nulaketdi lehitimo ken legal ken masurot iti amin a proseso.
