LA UNION – Sinentensyaan iti Sandiganbayan First Division ti 40 tawen a pannakaibalud ni Tubao, La Union Mayor Dante Garcia ken pito pay nga indibidual kalpasan a mapaneknekan ti nasao a korte a naglabsing dagitoy iti Anti-Graft and Corrupt Practices wenno Republic Act 3019 gapu ti maipagarup a naanomalya a panaggatang ti fogging chemicals iti baetan ti tawen 2005 ken 2006.
Base ti desisyon nga inruar ket pinirmaan ni Justice Amparo Cabotaje-Tang, presiding officer ti Sandiganbayan First Division idi Pebrero 9, 2018 idiay Quezon City, malaksid ti nasao nga alkalde ket karaman pay kadagiti nakaswan a co-accused nga isuda Rosemary Magwa, Dominador Aquino, Rosita Palaroan, Domingo Estoesta, Clarita Gaburian, Gina Collado, bin-ig a miyembro iti bids and award committee ti bayan; ken ti chemical supplier a ni Roger Crisostomo.
Nakasurat pay iti nasao a desisyon, nagatang dagiti kemikal idi Agosto 19 ken 30, Setyembre 15, Nobyembre 10, 2005; ken idi Hunyo 1, Hulyo 12 (dua a daras a naggatang), Hulyo 19, ken Hulyo 27, 2006.
Iti nadakamat pay a desisyon, kada panaglabsing iti siyam nga iregular a transaksyon ket adda iti innem agingga 15 tawen a pannakabalud ken saan a mapalubusan nga agiggem iti aniaman a posisyon ti gobyerno.
Kabayatanna, mangidatag met iti motion for reconsideration (MR) ni Mayor Garcia ken ti dadduma pay nga akusado idiay korte.
Iti pannakiuman ti Bombo Radyo La Union iti alkalde, kinunana nga adda ti makitkitada nga abut iti nagbalin a desisyon ti Sandiganbayan.
Iti panangilawlawag ni Garcia, nangabak iti apelada idi idiay Court of Appeals (CA) kontra kadagiti nagbalin a desisyon ti Office of the Ombudsman maipapan iti isyu ti “overpricing” iti panaggatang kadagiti kemikal idi panawen nga agraraira ti dengue idiay ili.
Base kinunana iti desisyon ti CA ket awan ti napasamak nga “overpricing” iti panaggatang kadagiti kemikal.
Agsidsiddaaw met iti benneg ti alkalde a no pay a ti isyu iti “shopping” wenno ti proseso iti panaggatang ti renesolba iti Sandiganbayan, imbes a ti isyu iti “overpricing” gapu ta daytoy iti sentro ti sangsanguenda a reklamo.
Innayon pay ni Mayor Garcia, mabalin nga adda iti pakainaigan ti politika ti panangiruar iti desisyon gapu ta nakaskasdaaw a naabswuelto ti maysa a supplier ti kemikal manipud iti ili ti Agoo.
Immuna iti daytoy, iti nasao a reklamo ken indatag idi ni sigud a Tubao Vice-mayor ken Atty. Lauro Gayo kontra kadagiti akusado idiay opisina ti Ombudsman.
Idi 2012 ket napaltugan ken napapatay ni Gayo iti uneg ti law office-na idiay ili ti Agoo, La Union.
