Inallukoy ni Baguio City Mayor Benjamin Magalong iti Commission on Audit (COA) a mangisayangkat ti special audit kadagiti sumagmamano a pondo ti national budget kalpasan a mangiruar ti desisyon iti Korte Suprema mainaig kadagiti probisyon dagiti national budgets para iti tawen 2024, 2025, ken 2026.
Karaman kadagiti pondo a kayat a masukimat iti P449.5 bilyon nga unprogrammed appropriations iti 2024 budget ken P17.99 bilyon a kanayunan a pondo para iti Special Road Fund ti 2025 budget.
Dinawat na met a masukimat iti pondo nga inruar iti sidong ti probisyon nga indeklara a panaglabsing iti Konstitusyon ti 2026 budget.
Malaksid iti daitoy, nagpanawagan ni Magalong iti Office of the Ombudsman a mangisayangkat ti imbestigasyon tapnu maamwan nu adda dagiti opisyal a rumbeng nga agsungbat maiyannurot iti linteg.
Segun kenni Magalong, napateg a masigurado a tunggal piso manipud iti kaban ti pagilian ket umno a maususar ken para iti karbengan ti publiko.
Impaganetget na met nga aniaman nga imbestigasyon ket rumbeng a maibatay iti ebidensiya ken raraemen iti due process.
