LA UNION – Binilin ni Rosario Mayor Bellarmin Flores iti Rosario Police Station iti panangidaulo ni PMajor Garry Anthony Casem, nga imbestigaran nu adda panaglabsing iti Public Health Protocols ken iti naipaulog nga Executive Order No. 7 series of 2021 a naiyisyu idi January 13, 2021 seknan iti pannakatay ti maysa a 18-anyos nga agtutubo a residente ti Purok 3, Barangay Concepcion, Rosario, La Union.
Maipalagip a natay iti saanen a nainaganan nga agtutubo idi malem ti Sabado, Enero 16, kalpasan a nalmes iti kabaybayan idiay Barangay Sta Rita Central, Agoo, La Union.
Nakailanad ngamin iti EO No.7 nga epektibo idi rabii ti Enero 13, naipasidong iti Enhanced Community Quarantine (ECQ) wenno lockdown, iti Purok 3, Barangay Concepcion kalpasan a dua a residente ditoy iti nagpositibo iti COVID-19.
Base iti pakdaar ti Rosario LGU, natay iti 18-anyos nga agtutubo bayat nga agraraira pay laeng ti lockdown iti nasao a lugar.
Kabayatanna, nanayunan dagiti lugar a naipasidong ita iti ECQ wenno lockdown iti nasao nga ili.
Base iti impaulog ni Mayor Flores nga Executive Order No. 8, Series of 2021, umabot iti 20 a pamilya idiay De Guzman Street, Purok 3, Poblacion East; kabilang iti residential compound iti Purok 1, Barangay Subusub; ken maysa pay a residential compound iti maysa a subdibisyon idiay Barangay Concepcion, Rosario, La Union iti naipasidong iti ECQ wenno lockdown epektibo idi Enero 17, iti oras ti alas 8:00 ti rabii.
Iti nasao nga addang ket tapno dagus a maisayangkat iti contact tracing kadagiti nadakamat a lugar ken maprebentaran iti panagwaras ti COVID 19 kalpasan a makumpirma iti panagpositibo iti tallo a residente.
