LA UNION – Makarikrikna pay laeng ti buteng, nerbiyos ken saan pay laeng a makaturog ti nasimbeng nangruna iti rabii dagiti Pilipino nga adda idiay Morocco, kalpasan ti napigsa a 6.9 magnitude a gingined a timmama iti nasao a pagilian idi rabii ti Biyernes.
Daytoy iti imbinglay a karirikna ni Bombo International News Correspondent Florita Saber nga agtrab-trabaho kas Household Service Worker idiay Casablanca, Morocco iti uneg ti 13 a tawen.
Kinuna ni Saber nga adda da iti maika-10 a kadsaaran (10th floor) ti pasdek idi timpuar ti napigsa a panagdayyeg.
Dagus dagitoy a bimmaba a nagturong iti parke ket adu a tattao iti nagpalabas ti rabii, iti ruar ti pasdek ken babbalay.
Kinuna ni Saber nga adda iti naipadamag a maysa a Pilipino a maipagarop a mapukpukaw kalpasan a na-shock iti napigsa a gingined, ngem madama pay laeng daytoy a maiber-peripika.
Segun kenni Saber, uray kasub-subli na iti nasao a pagilian manipud panagbakasyon na ditoy Pilipinas, kayatna nu mabalbalin ti agawid gapu iti napasamak.
Kinuna na a ti laeng pagsad-sadagan da a Pilipino ita idiay Morocco ket iti panagkararag tapno agtalinaed dagitoy a natalged ken saanen a maulit ti napigsa a gingined, a maibilang a kapigsaan a timmama iti nasao a pagilian iti uneg ti nasurok 100 a tawen.
Iti agdama, umaboten ti nasurok 2,400 a tattao iti natay ken nasurok 2,000 dagiti nasugatan.
