LA UNION – Sinerrek ti maysa a lalaki nga agtatakaw iti pagtaengan ti maysa nga agassawa idiay Barangay Anduyan, Tubao, La Union idi parbangon ti Lunes, Mayo 24.
Intaray iti saan pay nga am-ammo a suspek iti aganay P12,000 a kuwarta iti agassawa a biktima, nga isuda Rosendo ken Emma del Pilar, agtawen ti 42 ken 35.
Iti pannakiuman ti Bombo Radyo La Union kenni Pol. Major Joel Cabaddu, agdama nga Officer-in-Charge ti Tubao Police Station, awan ti naaramidan dagiti biktima idi kiddawen ti suspek nga ited ti kuwarta da, agsipudta nagbuteng da iti pangta ti suspek nga armado ti buneng, a patayenna iti agassawa.
Segun pay kenni Cabaddu, addan iti person of interest iti napasamak a panagtakaw, ngem saan da pay a mabalin nga ibaga ti kinasiasino daytoy agsipudta agtultuloy iti panagkalap da iti kanayunan nga impormasyon ken ebidensiya kontra iti suspek.
Sakbay iti insidente, nakariing iti agassawa pasado alas 4:00 ti parbangon idi Lunes gaputi karasakas a nadlaw da iti maikadwa a kadsaaran iti balay dagitoy.
Naklaat da laengen idi agparang iti suspek nga armado ti buneng, kasaruno iti panagkiddaw na ti kuwarta.
Naglibas iti suspek babaen iti pannagna na a bimmaba manipud iti maikadwa a kadsaaran ti balay.
