Saan pay unay a madupdupodop ti pasahero iti maysa a bus terminal ditoy Siudad ti San Fernando, La Union ita nga Holiday Season.
Segun kenni Edmund Aspiras, Terminal Supervisor, kaadduan kadagiti pasahero ket aggapo idiay National Capital Region nga agawid ditoy probinsia.
Namnamaen da nga agdupodop dagiti pasahero inton Enero 1-5, 2026 gapu ta isu iti manamnama a panagsubli dagiti empleyado nga agtatrabaho iti sabali a lugar.
Impanamnama ti nasao a bus company a nasayaat iti kasasaad dagiti drayber, konduktor, ken dagiti bus sakbay a bumiyahe tapno masigurado iti kinatalged ken maliklikan dagiti disgrasya.
Nagbalin metten nga air-conditioned iti terminal tapno agbalin a komportable dagiti pasahero, ken adda pay ti nailatang a telibision tapno mangliwliwa bayat iti panagurayda ti lugan. Malaksid ditoy ket adda iti naka-intall a CCTV nga agserbi kas kanayunan a seguridad.
Dagus a suksukimaten ti guwardiya dagiti gamit nga imet dagiti pasahero tapno maammuan no adda iti tugot da a makadadael a banag. Adda ti us-usaren da a metal detector tapno masigurado pay nga awan ti armas a tugot dagiti pasahero.
Kabayatanna, nagpalagip ni Aspiras kadagiti biyahero a bassiten dagiti gamit ken awiten laeng dagiti kasapulan tapno maakomodar amin a pasahero iti lugan, kangrunaan ita nga Holiday Season.
Ti kadawyan met a problema dagiti pasahero nga makadandanon kadakadua ket dagiti mabatbati a bagahe ken mapukpukaw a cellphone. Kinuna ni Aspiras a lagipen dagiti pasahero iti bus number da tapno no adda man ti mabati a gamit ket ma-trace a dagos ken maala dagiti nabati da a gamit.
