Nakasagana ti maysa a bus terminal ditoy siudad ti San Fernando para iti namnamaen a panag-adu dagiti biyahero iti umas-asideg nga Undas 2025.
Segun kenni Mr. Edmund Aspiras, maysa a terminal supervisor, impasigurado da a nasayaat ti kasasaad dagiti drayber, konduktor, ken dagiti bus sakbay nga agbyahe.
Nag-hire da met ti kanayunan a drayber tapno adda ti shifting, nangnangruna no adu dagiti pasahero ken adayo ti destinasion da.
Maipaay met ti nadalus, naurnos, ken nasayaat a gundaway bayat ti panagurayda ti lugan. Para iti pammadayaw ken seguridad, iti entrada pay laeng ket masansan a sinisita dagiti gwardya ti tattao tapno maamuan no adda kadakuada dagiti armas wenno sabali pay a makadadael a banbanag.
Ipalpalagip ti bus company kadagiti biyahero a bassiten dagiti gamit ken awiten laeng dagiti kasapulan tapno malaon amin a pasahero iti lugan, nangnangruna ita a sumangbay iti Undas 2025.
