Naarestar ti maysa a durugista ken ti live-in partner na kabayatan ti implementasyon ti search warrant dagiti nagbinnulig nga operatiba ti Philippine Drug Enforcement Agency Regional Office I – La Union Provincial Office (PDEA RO I – LUPO), Agoo Police Station, Police Regional Office 1-Regional Intelligence Division (PRO I-RID), La Union Police Provincial Office – 2nd Provincial Mobile Force Company (LUPPO-2nd PMFC), ken Regional Intelligence Unit – Provincial Intelligence Team (RIU-PIT), idiay Barangay San Julian West, Agoo, La Union.
Binigbig ni PDEA RO 1 Regional Director, Atty. Benjamin Gaspi dagiti suspek a ni alias Jonard, maysa a construction worker ken high-value target drug personality kasta met ni alias Berna, live-in partner na ken agpada dagitoy a residente ti nasao a barangay.
Kabayatan ti operasyon a naiyuswat agarop alas-5:49 ti bigat iti aldaw ti Mierkules, Agosto 6 ket narekobre dagiti 18 a pidaso ti heat-sealed transparent plastic sachet a naglaon ti shabu ken agdagsen ti nasurok-kumurang a 34 nga gramo, mainayon pay dagiti sumagmamano a drug paraphernalia.
Mapilaan dagiti suspek ti panaglabsing ti Section 11 (Possession of Dangerous Drugs), ken Section 12 (Possession of Drug Paraphernalia), Article II ti RA 9165 wenno Comprehensive Dangerous Dugs Act of 2002 ken agdama da itan a nakadetene idiay Agoo Police Station jail facility.
