LA UNION – Nagpirma iti maysa a katulagan iti Commission on Population (POPCOM) ken Department of Education (DepEd) Region One, nga addaan ti ranta a tulongan dagiti agtutubo para iti natalged a panagbiag ken masakbayan dagitoy.
Iti Memorandum of Understanding (MoU) ti POPCOM ken DepEd ket addaan ti tarigagay a papigsaen iti adolescent health programs iti intero a region 1, tapno maatipa iti adolescent births wenno iti nasapa a panagpasngay dagiti agtutubo.
Maibasar iti 2017 national demographic and health survey, adda iti maikapat a puwesto iti Region 1 iti intero a pagilian, nu maipapan iti bilang dagiti agtutubo a nasapa a nagpasngay wenno teenage pregnancy.
Malaksid dayta, maipaayan pay ti naan-anay a pannaka-ammo ken impormasyon dagiti agtutubo ti maipapan iti sakit nga HIV/AIDS, kaso ti panagpakamatay wenno suicide cases, panagabuso, ken mental health concern.
Base iti report, immadu ti suicide cases ditoy Region One a kaadwan ket epekto iti nagraira a sakit a COVID 19.
Base met iti datus ti DOH Region 1, manipud tawen 2020 ket nakailista da iti 89 suicide cases, a pakaibilangan iti 29 idiay Pangasinan, 26 idiay Ilocos Norte, 23 ditoy La Union ken 11 idiay Ilocos Sur.
Kaadwan a biktima ket lallaki nga agtawen ti 20 agingga 59 years old.
Kabayatanna, ti nasao a programa ket paset iti implementasyon ti RA 10354 wenno Reproductive Health Law.
