Dupdupodopen dagiti tattao iti maysa kadagiti mall a masarakan ditoy siyudad ti San Fernando, walo nga aldaw sakbay iti kaaldawan ti paskua.
Kangrunaan a gatgatangen dagiti umili ket dagiti maisagana inton Noche Buena wenno iti mismo a kaaldawan ti Paskua, ken dagiti banag a pangregalo.
Iti pannakiuman ti Bombo Radyo kadagiti sumagmamano a customers, saan da a maliklikan iti makarikna ti tuok gapu iti nabayag a panaguray ken nabuntog a panagabante ti pila, kangrunaan dagiti natataengan a marigatan a tumakder ti mano a minuto.
Panawaganda iti management dagiti establisimiento a mangilatang kuma iti naisina a pila wenno ‘priority lane’ para kadagiti nataengan, masikog, ken persons with disabilities (PWD) a kas iti maipatpatungpal kadagiti sumagmamano a pampubliko nga opisina ti gobierno.
Kabayatanna, nupay adda iti panagngato ti presio dagiti sumagmamano a produkto, agtultuloy iti demand gapu ta segun kadagiti consumers a maminsan laeng ti makatawen iti panagrambak ti Paskua a napateg iti kultura ken tradision ti pamilyang Pilipino.#
