Maysa a menor de edad ditoy probinsya ti La Union iti nailista a casualty ti Bagyong Emong.
Pinasingkedan ti San Juan Municipal Police Station iti damag kabayatan ti panagbisita da idi Hulyo 28 ken napagammoan a ti biktima ket maysa a 12-anyos, Grade 7, ken residente ti Barangay San Felipe, San Juan, La Union.
Segun iti step-mother iti biktima, madama iti panagsagana ti pamilya dan nga agbakwit idi kangitingitan ti panagduprak ti napepegges nga angin ken nadadagsen a panagtudo nga inggubuay ti Bagyong Emong idi direkta a natwangan ti maysa a kayo ti mangga iti pagtaengan da kabayatan ti kaadda da iti uneg.
Gapo iti daitoy ket agpapada a nagsagaba iti pannakadunor iti biktima, dagiti dua a kakabsat na a 9-anyos ken 22-anyos, ken iti step-mother da bayat a saan met a naan-ano iti ama da.
Ti biktima iti kakaroan iti sinagaba a pannakadunor ti nagduduma a paset ti bagi na ngem saan met a basta a maiturong daitoy iti ospital gapo iti kasasaad ti paniempo ken nangato a lebel ti danum iti creek manipud iti San Felipe Dam. Gaksang-gasat ket pimmusay isuna kalpasan laeng ti sumagmamano nga oras.
Iti agdama ket malamlamayanen iti biktima idiay pagtaengan ti uliteg (uncle) na iti kapada metlaeng a barangay.
