Nangipaay iti panawen dagiti dadduma a mangrambak iti simple ngem addaan kaipapanan a wagas, a maisupadi kadagiti nagarbo a selebrasion a gagangay nga aramiden dagiti dadduma a pamilia ditoy siudad ti San Fernando para iti baro a tawen.
Maysa kadakuada ti pamilia ni Rinalyn Rinonos, a nakauman ti Bombo Radyo La Union idi kalman, Disiembre 31.
Sakbay ti Baro a Tawen, pinili ti pamilia Rinonos a busbosen dagiti nabati nga oras ti Disiembre 31 a rumuar ken kaduaen dagiti annak da nga agay-ayam iti playground area ti Plaza.
Segun kenni Rinonos, napatpateg iti quality time nga agkakadua kas pamilia ngem ti nagastos a selebrasion.
Uppat laeng ti pamiliada — isuna, ti asawana, ken dagiti dua nga annakda — isu nga umdasen kadakuada iti simple a pannangan a buklen dagiti sumagmamano a putahe.
Praktikal daytoy a wagas ti panagsagana kangrunaan iti kangitingitan ti agtultuloy a panagngato ti presio kadagiti kangrunaan a tagilako.
Nakatulong dagiti impaay ti gobierno ken dadduma pay a sektor gapu ta nangkissay daytoy iti gastos.
Impaganetget pay ni Rinonos nga iti laksid dagiti karit ti biag kas addaan asawa ket napateg iti “give and take”, silulukat a komunikasion, ken panagkinnaawatan tapno mapagtalinaed a natibker ken saan a marakrak iti pamilia.
Para ita a tawen 2026, simple ngem addaan kaipapanan iti resolusion na. Daytoy ket iti agbalin a nasayaat a nagannak kadagiti dua nga annak da, dumakkel da nga addaan ti panagbuteng iti Dios, nasayaat a kababalin, ken ti pamilya a pakakitaan ti napnuan ayat ken panagkaykaysa.
Iti laksid ti kinasimple ti panagrambak da, ipakpakita iti estoria ti pamilia Rinonos nga iti pudno nga espiritu ti Baro a Tawen ket saan a marukod ti bilang dagiti naisagana wenno kadakkel ti selebrasion, no di ket babaen ti ayat, panagkaykaysa, ken namnama a mangsango kadagiti sumaruno a tawen kadua ti natibker ken sibubukel a pamilia.###
