LA UNION – Nakaru a ladingit iti marikrikna ita ti pamilya, gagayyem ken katrabahuan iti Public School Principal a ni Roselyn Munio, residente ti Dr. Camilo Osias, Balaoan, La Union gaputi saan a ninamnama nga ipupusay daytoy kalpasan a maaksidente iti man-manehuen na a motorsiklo agarop alas 8:00 itay bigat iti kawatiwatan ti provincial road idiay Brgy. Cadapli, Bangar, La Union.
Iti pannakiuman ti Bombo Radyo La Union kenni Police Staff Sergeant (PSSg.) Edward Peralta ti Bangar Police Station, kinunana nga agpada nga agturong iti daya a direksiyon iti motorsiklo ni Munio ken iti traysikel a minaneho ni Edgar Gumangan, residente ti Central West #2 Bangar, La Union idi maipagarop a nag-overtake iti biktima, ngem isumet ti panag-left turn ti traysikel, banag a nagdinnungparan dagitoy.
Gapu iti napigsa nga impact ti aksidente, nagsagaba iti nakaru a pannakadunor iti ulo ken mata ni Munio iti laksid a nakasuot ti helmet, a puon ti dagus a nakatayan daytoy.
Base iti inisyal nga imbestigasyon dagiti otoridad, ag-report koma iti pagadalan da idiay Cadapli ti nasao a principal idi mapasamak ti aksidente, a 50 metro laengen manipud iti eskuwelaan.
Iti bangkay ti biktima ket naiturong iti maysa a punerarya idiay San Juan, La Union.
Kabayatanna, iti respondent driver nga adda iti kustodiya ti Bangar Police Station ket manamnama a maipilaan ti kaso a Reckless Imprudence Resulting to Homicide.
