LA UNION – Pimmusay ti maysa a 25-anyos a baro kalpasan a naidungpar ti minaneho daytoy a motorsiklo iti likod ti trailer truck iti kawatiwatan ti national highway a masakupan ti Brgy. Baroro, Bacnotan, La Union alas-11:00 idi rabii, May 12.
Nabigbig iti biktima a ni Clarence Corpuz ken residente ti Brgy. Cabaroan, Bacnotan, La Union.
Maibasar iti imbestigasyon ti Bacnotan Police, sarsarunwen ni Corpuz iti trailer truck a minaneho ti managan Demetrio Bravo, 33-anyos, ken residente ti Bolinao, Pangasinan agturong iti abagatan a direksyon.
Idi nakadanon ti truck iti matartarimaan a paset iti kalsada, maipagarop a nagmenor daytoy ngem dita metten a naidungpar ti motorsiklo nga adda iti likudan ti truck.
Iti kapigsa ti impact ti aksidente, natumba ti biktima iti kalsada ket nagsagaba daytoy iti nakaro a pannakadundunor kasaruno ti pannakaiturong na idiay Bacnotan District Hospital ngem naideklara a pimmusay babaen iti attending physician.
Kabayatanna, nawayawayaan metten manipud iti kustodiya iti Bacnotan Police ti driver iti truck kalpasan a mangited daytoy iti initial a settlement iti pamilya ti biktima.
