Impadamag ti Department of Health (DOH) a mapatta-patta a 36% dagiti Pilipino, wenno maysa iti tunggal tallo, iti addaan ti chronic kidney disease (CKD), maysa a kondision nga in-inot a kumapkapsot iti panaggunay ti bato ken marigatan nga ikkaten iti rugit ken sobra a danom iti bagi.
Segun ti ahensia, mabalin a tamaan iti sinoman ngem nangatngato iti peggad kadagiti addaan ti diabetes, altapresion, obesity, family history iti sakit ti bato, ken kadagiti agsigsigarilyo wenno umin-inom ti arak.
Iti umuna nga innem a bulan ti 2025, dimmanon ti nasurok-kumurang ₱27 billion iti nagastos ti PhilHealth para iti nasurok 2-million dialysis claims.
Inawagan ti ahensia iti chronic kidney disease kas “silent killer” gapu ta awanan daytoy ti sintomas iti early stage, ngem iti panagkarona ket mabalin a mangigubuay ti panagmaga ti rupa, ima ken saka, masansan a panagisbo iti rabii, kaawan ti ganas a mangan, ken rigat iti panaganges.
Kas panangliklik, maparegta iti publiko a liklikan iti ultra-processed foods nga addaan ti nangato nga asin, asukar, ken preservatives, umminom ti umdas a danom, ag-ehersisyo, ken liklikan iti bisyo tapno mapagtalinaed a nasalun-at dagiti bato.###
