CITY OF SAN FERNANDO, LA UNION – Natay iti maysa nga agtutubo bayat a nadundunor met iti backride na kasaruno iti pannakadisgrasya da idiay kawatiwatan ti Mayor Lorenzo Dacanay Avenue, Barangay Canaoay, Ciudad ti San Fernando, La Union, agarop alas-kwatro ti parbangon, idi Oktubre 8, 2026.

Ti nasao nga aksidente ket pakairamanan iti driver a ni Marjun Cuision Fabian, 20-anyos, service crew, residente iti Barangay Central West, Bauang, La Union, ken ti backride na a ni Jhayean “Kate” Cortes Pimentel, 21-anyos, maysa a decorator, ken residente iti Barangay Payocpoc, ili metlaeng iti Bauang.

Sakbay iti aksidente, dinagas ni alias “Reynaldo,” ni Marjun iti pagtaengan da tapno umatendar iti birthday party. Dagiti dua ket pagaammo nga agkatrabaho iti maysa a fast-food company. Nirugian dan iti naginom idi nakasangpet da iti event. Idiay da metten a naam-ammo dagiti uppat pay a kakadwa da.

Saan pay a nakuntento dagitoy ket nagtutulagan da iti agturong sadiay AZ Superclub, Junction Area, Barangay Catbangen, Ciudad ti San Fernando, tapno ituloy iti aginom ti arak. Tallo iti motor a nausar agturong sadiay AZ Club: tig-maysa a driver ken pasahero. Naka-backride laeng ni Marjun kenni alias “Reynaldo” kadaitoy a gundaway.

Kinuna ni Kate nga impilit ni Marjun nga isuna iti agmaneho iti motor idi paawid dan, nga uray saan na met daitoy a kukua, kasta met a damdamo da paylaeng nga agam-ammo. Gapo iti kapartak ni Marjun nga agmaneho ket napukawan daitoy iti kontrol ti manobela ken nag-overshoot. Dead-on-the-spot isuna kasaruno a naipurwak ken timmama iti maysa a kayo ken pader.

Nadundonar met iti backride na a ni Kate ken naiturong isuna sadiay Ilocos Training and Regional Medical Center para iti medikal a pannakataming.

Segun iti San Fernando City Police Station, Reckless Driving iti rason ti aksidente ken nakanayon pay iti kaadda iti impluwensya ti nasanger dagiti biktima. Maysa pay ket awan iti lisensya ni Marjun nga agmaneho, kasta met a saan a nakasuot dagitoy iti helmet.

Iti sabali a bangir, kumidkiddaw ni Dianne Lomibao, ikit ni Marjun, ken dagiti sabali pay a miembro ti pamilya da iti naun-uneg pay nga imbestigasyon agsipud ta agtaltalek dagitoy nga adda iti foul play a napasamak. | via Bombo Rafael Galano