LA UNION – Maysa a pulis ken maysa a lima-anyos nga ubing iti nagbalin a biktima ti pammaltog ti riding-in-tandem idiay Barangay Dili, BaUang, La Union.
Nabigbig dagiti biktima nga isuda SPO3 Jose Medina, 52, residente ti San Benito Sur, Aringay, La Union ken Gillian Medina, 5, residente ti Barangay Dili, Bauang.
Saan met a naan-anu iti maysa pay a kadwa dagiti biktima, a ni Marilyn Dacumos, 38, balasang, residente ti Barangay Dili.
Maibasar iti report, dagiti biktima ket nakalugan ti kotse a dumaldalyasat iti barangay road, idi kellaat a paltugan dagiti saan a nabigbig a suspek, a dagus a naglibas kalpasan ti insidente.
Ni SPO3 Medina ket nagsagaba ti tama ti paltog iti kannigid nga abaga ken barukong na bayat a ti ubing ket napaltugan iti kannigid nga ima na.
Dagiti dua a biktima ket naiturong ken agtultuloy a matamtaming iti ospital.
Kabayatanna, an-anopen itan dagiti kameng ti Bauang Police Station dagiti suspek.
Agtultuloy met ti imbestigasyon dagiti otoridad tapno amwen ti motibo iti insidente.
