LA UNION – Nagsagaba iti pannakadundunor ti 28-anyos a lalaki kalpasan iti panagdinnungpar ti manmanihwen daytoy a motorsiklo ken tricycle iti kalsada a masakupan ti Brgy. Paraoir, Balaoan, La Union alas-7:15 idi rabii, aldaw ti domingo, June 20.
Nabigbig ti biktima ken nagmaneho iti motorsiklo a ni Rolando Jimenez, 28-anyos, residente ti Brgy. Ubbog, Bangar, La Union.
Iti imbestigasyon ti Balaoan Police, agturong iti amianan a direksyon ti motorsiklo a minaneho ni Jimenez bayat nga agturong ti abagatan a direksyon ti tricycle a minaneho ti managan Dominador Bautista Jr., 39-anyos ken residente ti Brgy. Paraoir, Balaoan.
Maipagarup nga immagaw ti bangir a linya ti motorsiklo a rason ti panagdinnungpar da iti kasinnabat daytoy a tricycle.
Nagsagaba iti pannakadundunor ni Jimenez kasaruno ti pannakaiturong daytoy iti pagagasan para iti pannakataming na bayat a saan a nadangran ti nagmaneho ti tricycle.
Naamwan manipud iti imbestigador a paawiden dagiti dua idi napasamak iti insidente no sadinno ket naduktalan a positibo iti nasanger nga inumen ni Jimenez.
Nakahelmet met daytoy idi napasamak ti insidente.
