LA UNION – Pormal a nga inyuswat ti Department of Health iti programa na a Measles-Rubella and Oral Polio Vaccination Supplemental Immunization idi kalman ditoy probinsiya ti La Union.
Mapatta-patta nga umabot iti 40 nga ubbing nga agtawen ti 5 nga agpababa iti nabakunaan iti naisayangkat nga Immunization Activity idiay La Union Provincial Capitol.
Indaulwan daytoy ti Department of Health (DOH) kadwa da iti National Task Force Against Covid-19, Provincial Government of La Union, City Government of San Fernando, DOH Region 1, Provincial Health Office ken dadduma pay nga ahensiya ti gobyerno ken stakeholders.
Suportado ni La Union Governor Francisco Emmanuel Ortega iti nasao nga addang ti gobyerno nga addaan ti tarigagay a protektaran dagiti ubbing manipud iti makapatay a sakit a measles-rubella ken polio.
Kagiddan daytoy iti panangallokoy ni Ortega kadagiti nagannak nga ipabakuna dagiti ubbing tapno masalakniban iti salun-at dagitoy.
Mainaig ti daytoy, nagyaman ti gobernador iti pannakapili iti probinsiya a La Union a pakaiyuswatan ti nasao a programa.
Iti Brgy. Poro iti kaunaan a barangay ditoy syudad a nangisayangkat ti nasao a programa.
Mangrugi ti Phase I ti panagbakuna inton Oktubre 26 agingga Nobyembre 25, 2020 iti intero a pagilian bayat a ti Phase II ket inton sumaruno a tawen.
Kabayatanna, siniguro dagiti LGU’s iti Ilocos Region a nakasaganan ti schedule dagiti barangay iti masakupan da, a mangisayangkat iti nasao a programa ti gobyerno.
