Limmabes iti maysa milyon a metriko a tonelada iti meat imports ti Pilipinas manipud Enero agingga Hulio ita a tawen, maibasar iti kaudian a datos ti Bureau of Animal Industry (BAI).
Dimmanon iti 1.02 million a metriko tonelada iti pakabuklan a meat imports, 11 a porsiento a nangatngato no idilig iti 919,842 metriko tonelada iti kapada a panawen idi napalabas a tawen.
Kadakkelan iti pork imports a ngimmato ti 10% wenno agingga iti 541,405 metriko tonelada, idinto a ngimmato ti 15% iti chicken imports agingga iti 335,669 metriko tonelada.
Nagtalinaed a saan a nagbaliw iti importasion ti karne ti baka nga agarup 110,570 a metriko tonelada.
Kabayatanna, ti Brazil iti kangrunaan a pagtataudan ti imported meat nga addaan ti 491,199 metric tons, sarunuen ti Estados Unidos nga addaan ti 127,381 ken Australia nga addaan ti 54,107 metric tons.
Iti sidong ti Executive Order 116, impangato ti gobierno iti minimum access volume para iti imported a karne ti baboy iti 204,210 a metriko tonelada manipud iti 54,210.###
