LA UNION – Sinita dagiti otoridad a mangipat-patungpal ti OPLAN SITA, iti monumento a sakop ti Barangay Parian, San Fdo. City, La Union iti maysa a baro gaputi panagmaneho na iti motorsiklo nga awanan ti plate number ken side mirror.
Nabigbig ti suspek iti nagan a Giane Carlo Laygui, 21-anyos, baro, mekaniko, residente ti Barangay Pagdalagan Norte ditoy syudad.
Malaksid nga awan ti plate number ken side mirror iti minaneho na a motorsiklo, napaay pay ni Laygui a makaidatag ti driver’s license kadagiti otoridad.
Nadiskubre pay dagiti pulis kabayatan ti insayangkat da nga inspection iti compartment ti motorsiklo, iti dua (2) a zip lock transparent plastic sachet iti maipagarop a marijuana, mapatta-patta nga agdagsen ti 8 gramo, ken agbalor ti P960.00
Naibalud iti suspek ket sumangsango ita iti agtutuon a kaso, a pakaibilangan iti violation iti Comprehensive Dangerous Drugs Act of 2002 (Republic Act No. 9165).
