Saan a natalantan iti agtultuloy a rinnupak idiay Middle East iti panagtaripnong ni Presidente Ferdinand “Bongbong” Marcos Jr. ken dagiti US Defense Officials a naangay idiay New York, America.
Segun kenni Palace Press Officer ken Presidential Communications Office (PCO) Undersecretary Claire Castro, nakasentro iti meeting ti pannakapapigsa ti Philippines-United States Defense Partnership ken saan a ti situasion idiay Middle East.
Kenuna ni Castro a karaman kadagiti napagsasaritaan dagiti nakatuding a Balikatan exercises iti nagbaetan ti militar ti pagilian ken ti Estados Unidos, karaman iti agtultuloy a pannakaipatungpal ti Mutual Defense Treaty iti nagbaetan dagiti dua a pagilian.
Iti saludsod no adda ti baro a commitment ti Estados Unidos iti biang ti security support iti pagilian, kenuna ni Castro nga agtalinaed iti commitment ti America a mangituloy ken ad-adda pay a papigsaen ti defense partnership iti dua a pagilian iti sidong ti agdama a katulagan.
Awan iti imbinglay a kanayunan a detalye iti Malacañang no adda pay ti sabali a banag a napagsasaritaan iti nadakamat a panagtaripnong.
Kabayatan ti panagbisita, nakipagkita ni Presidente Marcos kenni U.S. Undersecretary of Defense for Policy Eldridge Colby ken ti delegasionna idiay New York.
Nagsaritaanda iti pannakapapigsa ti kabaelan dagiti dua a pagilian a mangsaranget kadagiti pangta iti Indo-Pacific region, kasta met iti pannakapasayaat ti koordinasion ken panagtinnulong ti Armed Forces of the Philippines (AFP) ken military ti Estados Unidos babaen ti nagtipon nga operasion.
Pinasingkedan manen ti dua a dasig iti panagkumitda iti Mutual Defense Treaty ken agtultuloy a panagtitinnulong tapno mataginayon iti talna ken seguridad ti Indo-Pacific region.###
