LA UNION – Kimmiddaw iti suporta ken pannaka-awat ti militar iti publiko, a dumaldalyasat kadagiti naimuntar a checkpoints iti intero a Region 1 ken Region 3.
Kinuna iti Bombo Radyo La Union ni Maj. Amado Gutierrez, Division Public Affairs Office wenno DPAO Chief ti 7th Infantry Division, iti ar-aramiden da ket para iti pagsayaatan ti amin, isunga nagpanawagan daytoy ti panagkaykaysa iti amin, iti tiyempo ti krisis kas iti sangsangwen ita a problema ti pagilian, maipapan iti makapatay a COVID 19.
Aminado ni Maj. Gutierrez nga adda dagiti saan a pabor iti maipatpatungpal a nairut a checkpoint ngem agyaman met daytoy kadagiti ad-adu a makaawat ken sumup-suporta para iti pagimbagan ti amin tapno maliklikan iti panagwaras ti nasao a virus.
Segun kenni Gutierrez, adda iti pakabuklan a 65 checkpoints iti naimuntar iti Regions 1 ken 3 kas parte iti maipatpatungpal nga Enhanced Community Quarantine kontra COVID 19, iti banbantayan da kadwa da iti Philippine National Police (PNP).
Ditoy laeng Region 1, tallo dagiti kinumpirma ti DOH Region 1 a COVID cases ket maysa ditoy iti natayen iti sakit.
