Kinondena dagiti tallo a Mindanao lawmakers iti napasamak a pannakapattog ti barko nga MV Trisha Kerstin 3 iti kabaybayan a sakupen ti Basilan.
Impanawagan da ti nainget nga imbestigasion nga awan ti pabpaboranna seknan iti nasao nga insidente.
Iti panagbetla dagiti mammanday-linteg iti kongreso, maysa kadagiti impaganetget ni Basilan Representative Yusop Alano ket iti kinapudno a saan a daytoy iti umuna a gundaway a nairaman iti maysa a trahedia iti kompanya nga Aleson Shipping Lines.
Segun kenni Rep. Alano, ti kompania ket naaddaan ti tallo a nagsisina nga insidente iti uneg laeng ti napalabas a maysa a dekada.
Karaman kadagiti insidente ket iti limned nga MV Danica Joy 2 idi 2016, iti kasaruno ti Lady Mary 3 idi 2002 a nakaigapuan ti pannakatay dagiti 31 nga indibidual ken ti kauddian a trahedya ti MV Trisha Kerstin 3 a nakatayan dagiti 18 nga indibidual.
Dinakamat met ni Sulu Representative Samier Tan ni Zamboanga City Mayor Khymer Adan Olaso kas maysa a “part owner” ti Aleson Shipping Lines. Gapu ti daytoy ket kiniddaw na nga akuen iti responsibilidad kadagiti napasamak.
Iti pannakiuman ti Bombo Radyo kenni Mayor Olaso, impagenetget na a saan nga isuna ti “part owner” no di ket ti asawana.
Saan met isuna a paset ti conjugal property gapu ta daytoy ket maysa a korporasion.
Impaganetget met ni Kusug Tausug Party-list Representative Aiman Tan iti pagkasapulan ti “full at independent investigation” tapno maamuan no adda iti napasamak a panagbaybay-a iti dasig ti Philippine Coast Guard ken dadduma pay nga otoidad nga adda ti pakainaigan iti seguridad dagiti pasahero ken barko.###
