LA UNION – Maysa a misis iti nangipeksa ti arungaing na iti Bombo Radyo La Union kalpasan a saan a naipaayan iti ayuda ti gobyerno a Social Amelioration Program (SAP), a rumbeng a maipaay kadagiti nakukurapay ken kangruna nga agkasapolan, gaputi pannaka-apektar da iti COVID-19 pandemic.
Inaramid daytoy ni Marichu Castillano, addaan ti umno nga edad, single parent ken residente ti Barangay Poro ditoy syudad, kalpasan a maipagarop a kinarit isuna ti maysa a barangay health worker (BHW).
Immuna ti daytoy, kwinestiyon ni Castillano, iti saan a pannakairaman ti nagan na iti listaan dagiti benipisyaryo ken saan met a naikkan ti form a pirmaan na koma.
Gaputi dayta, inawagan na nga ‘unfair’ iti distribution ti SAP funds.
Sinungbatan met ni Barangay Kapitan Joseph Clarence Valero ti Barangay Poro ditoy syudad iti arungaing ti maysa a kalugaran na, a saan a karaman a naikkan ti P5,000 manipud iti SAP program ti gobyerno a nairanta para kadagiti ‘poorest of the poor.’
Kinuna iti Bombo Radyo La Union ni Kapitan Valero, iti listaan ti DSWD ti nagibasaran da kadagiti nabenipisyaran ti SAP distribution.
Kinapudno na, 1,570 dagiti SAP benificiaries iti Barangay Poro ngem nasurok a 1,400 laeng dagiti na-qualify.
