(Update) LA UNION – Nakatuding a maidatag idiay piskalya ita nga aldaw ti kaso a parricide kontra iti mister a maipagarup a pimmatay iti bukodna nga asawa idiay Barangay Central East, ili ti Bauang, La Union.
Nabigbig ti 35-anyos a suspek a ni Ferdinand Flores; ken ti 28-anyos a biktima a ni Marc Pauline Flores.
Naammuan ti Bombo Radyo manipud iti Bauang Police, kabayatan nga adda iti birthday party ti kaarruba dagiti agassawa idi August 16, 2019 ket maipagarup a nagrikyar dagitoy kalpasan a madiskobre ti suspek nga addaan ti ka-chat iti Facebook (FB) ti biktima.
Maipagarup a saan a nakapagteppel ti mister ken nangala daytoy iti kutsilyo kasaruno ti panangbagsolna iti bukodna nga asawa..
Dagus a naiturong idiay ospital ti biktima tapno mataming dagiti sugatna.
Maipagarup nga imbati ti mister iti inaramatna a kutsliyo iti bagi ti misis ken iti pay doktor ti nangasot daytoy idiay ospital.
Nauyos met laeng iti biag ti biktima gapu iti kinaadu ti bagsol ken nagsayasay a dara manipud iti bagina.
Kabayatanna, agtaltalinaed pay laeng iti pagbaludan ti mister kabayatan a maur-uray iti pagbanagan ti kasona idiay piskalya.
Maipagarup a nabartek ti suspek idi a mapasamak ti krimen.
