LA UNION – Agtultuloy iti isaysayangkat a search and rescue operation dagiti otoridad iti mapukpukaw a mangngalap idiay West Philippines Sea.
Nabigbig ti nasao a mangngalap a ni Rico Undocon, 30, residente ti Barangay Inhobol, ili ti Masinloc, Zambales.
Iti pannakiuman ti Bombo Radyo kenni Capt. Jojit Ofiaza, information officer ti Naval Forces Northern Luzon, kinunana a napaay a makaawid idiay balayda ni Undocon base iti istorya ti padana a mangngalap gapu ti panagsaplit iti dadakkel a dalluyon iti bilog daytoy.
Agpanpanawagan dagiti otoridad kadagiti mangngalap ken kadagiti barko nga aglaylayag a no kaspangarigan masarakanda ni Undocon iti kabaybayan ket tulonganda daytoy a makasubli iti pagtaenganna.
