Impasigurado ni Philippine National Police officer-in-charge Police Lieutenant General Jose Melencio Nartatez Jr. iti panangipamaysa iti kaso dagiti mapukpukaw a mamallot, kagiddan ti panagtakem na kas mangidaulo ti pulisya.
Segun kenni Nartatez, maysa daytoy kadagiti ‘pressing task’ a sanguen na agsipudta napateg a mabantayan iti panagdur-as ti kaso kangrunaan ta addan ti nabukel a reklamo kontra kadagiti karaman babaen iti inisyatiba ti Department of Justice.
Imbilin pay ti Heneral kadagiti nadutukan a police units kas iti Criminal Investigation and Detection Group ti nainget a koordinasyon iti DOJ, kadagiti testigo, ken dadduma pay a mabalin a makaipaay ti kanayunan nga impormasyon.
Iti ababa a termino ni Police General Nicholas Torre III kas PNP Chief ket naaramid ti pulisya a maalaan ti testimonya dagiti agkakabsat a Patidongan a maibilang nga addaan ti kangrunaan nga impormasyon iti panagpukaw dagiti mamallot.
Impangruna met ti PNP Forensic Group iti panagamiris kadagiti mapapati a rurog ti tao a narekobre idiay Taal Lake, kasaruno dagiti serye ti diving operations.#
