LA UNION – Isagsaganan ti Department of Environment and Natural Resources (DENR) ken Bacnotan Police Station ti kaso kontra iti mister a nangibiyahe iti maysa a truck a nagkarga iti 70 sako iti uging a natiliw babaen ti police check point idiay ili ti Bacnotan, La Union.
Nabigbig ti 30-anyos a suspek a ni Dexter Pescozo, residente ti Barangay Poblacion, Pilar, Abra.
Iti pannakiuman ti Bombo Radyo kenni C/Ins. Reynaldo Soria, hepe ti Bacnotan Police Station, kinunana nga awan iti maipakita a permit to transport manipud iti DENR ti suspek isu a saandan a pinalubusan nga ibiyahena pay dagiti nasao a produkto nga agbalor ti P13,000.
Malaksid kadagiti sinako nga uging ket kimopiskar met dagiti pulis ti nadakamat a lugan.
Nakatuding a maiturong iti aywan ti DENR dagiti nasao a banag tapno aramaten kas ebidensya kontra ti suspek.
Kaso a panaglabsing iti Presidential Decree 705 wenno Forestry Code of the Philippines ti reklamo a mabalin a sangnguen ti suspek iti korte.
