LA UNION – Isagsaganan ti pulisya iti kaso a panaglabsing ti Comprehensive on Dangerous Drugs Act kontra ti mister a maipagarup a naglako iti droga idiay Barangay Maoasaoas Sur, ili ti Pugo, La Union.
Nabigbig ti suspek a ni Jayvril Laroya, 28, residente iti Barangay Maoasaoas Norte ti nasao nga ili.
Naammuan ti Bombo Radyo manipud ti Pugo Police Station, maysa a sachet a naglaon iti maatap a shabu ti nakompiskar manipud iti ikot ti suspek babaen ti naisayangkat a buy bust operation.
Malaksid iti maatap a droga, karaman kadagiti naala dagiti otoridad ti drug paraphernalia ken P500 a nagpaay kas buy bust money.
Nakabalud ita ti suspek iti nasao a kwerpo ti pulisya kabayatan a maur-uray iti pagbanagan ti kaso daytoy iti piskalya.
