LA UNION – Natay ti maysa a mister babaen ti panagbekkel kalpasan iti maipagarup a panagapada ti misisna idiay Barangay Poblacion Norte, ili ti Caba, La Union.
Nabigbig ti nagpakamatay a mister a ni Ricardo Manongdo, 33, residente ti nasao a lugar.
Naammuan ti Bombo Radyo manipud iti Caba Police Station, maipagarup a nagbartek ti mister sakbay a nagturong iti balay ti katunganna a ni Jose Arcilla.
Nasarakan laengen a nakabitin iti bagi ni Manongdo iti uneg ti balay babaen ti panangaramatna ti maysa a kable ti kuryente a naigalot iti tengged ken atep.
Nagkedked metten ti pamilya nga ipasidong iti otosiya ti bangkay ti mister.
