LA UNION – Inaresto iti tauhan ti Philippine Drug Enforcement Agency (PDEA) Regional Office-1 ti maysa mister a maipagarup a naggandat a mangpasuksok kadakuada tapno aregloen ti kaso iti putotna a drug personality idiay suidad ti San Fernando, La Union.
Nabigbig ti nadakamat a 42-anyos a mister a ni Jack Lord Soriano ken ti putotna a 23-anyos nga immunan a natiliw babaen ti buy-bust operation a ni Jack Warren, agpada a residente ti Barangay Dili, ti Bauang iti probinsia.
Iti pannakiuman ti Bombo Radyo kenni Atty. Allan Ancheta, chief ti Legal & Prosecution Section ti PDEA Regional Office-1, kinunana a ginandat ti mister iti mangted kadakuada ti ama iti P81,000 a kantidad tapno maruk-atan iti putotna a nakabalud ti nasao nga opisina gapu ti pannakatiliw nga aglaklako iti shabu manipud ti maysa a bar idiay ili ti San Juan, La Union.
Naalaan pay ti video sigun iti opisyal ti inaramid a panangited iti pasuksok ti laklakay a Soriano.
Naidataganen iti kaso a ‘corruption on government official’ ti ama gapu iti gandatna a panangpasuksok kadagiti kauhan ti PDEA, kabayatan a panaglabsing iti Sec.5, Art. II ti Comprehensive Dangerous Drugs Act of 2002 gapu iti panangilako ti droga ti putotna.(AbsFlores)
