LA UNION – Personal a dimmatag ditoy broadcast center ti Bombo Radyo La Union iti maysa a 54-anyos a mister, tapno agpanawagan ti tulong iti mayor ti ili a Caba ken iti gobernador ti La Union, tapno maipasidong daytoy iti operasyon ken maiyakar iti sabali nga ospital.
Daytoy ket kalpasan a namin-uppat a daras nga intantan ti doktor na ti pannakaipasidong na koma iti surgery, manipud Hunyo 19; naitantan iti Hunyo 23; naituding a Hunyo 30 agingga nga imbaga ti doktor na a mai-schedule daytoy inton July 10, 2017.
Iti palawag ni Feliciano Sobredilla, 54, ti Barangay Wenceslao, Caba, La Union kinuna na nga awan pay ti available nga aparatus ken maysa laeng iti kuwarto a pakaisayangkatan ti nadakamat a surgery.
Naamwan a na-admit ti pasyente iti ospital idi Mayo 29,2017 ngem agingga ita ket saan pay a na-operaan.
Segun iti pasyente, iti naipit a lasag iti spinal wenno duri na iti kayat na nga ipa-opera, gaputa daytoy iti mangparparigat kenkuana ken daytoy ti rason iti marikrikna na a panagbibineg iti dackel a paset ti bagi daytoy.
