LA UNION – Natay iti maysa a mister gaputi sinagaba na a maysa a bagsol iti barukong babaen mismo iti uliteg daytoy.
Napasamak ti insidente, agarop alas 3:35 ti malem idi Nobyembre 30, 2020 idiay Barangay Rimos #3, Luna, La Union.
Nabigbig iti biktima a ni Rey Camarillo bayat a ti suspek nga uliteg na ket ni Alberto Camarillo, agpada a residente ti nasao a lugar.
Iti eksklusibo nga interview ti Bombo Radyo La Union kenni PMaj Gerardo Antonio, hepe ti Luna Police Station, kinuna na a bayat ti panag-iinom ti suspek, biktima, ken iti maysa pay a lalaki a nagbalin a witness dagiti otoridad, timpuar iti saan a panagkikinnaawatan dagitoy gaputi maysa a bote ti arak wenno 2×2.
Impagarop ti suspek nga adda pay maysa a bote ti arak nga inumen da ngem impapilit ti biktima ken ti witness nga awanen.
Gaputi nakaru a kinabartek, nangala ti patadem iti suspek nga isuti imbagsol na iti baba ti barukong iti biktima.
Dagus a naiturong ti biktima idiay Bacnotan District Hospital ngem naideklara a dead-on-arrival.
Segun kenni Antonio, awan ti susik iti baetan ti biktima ken suspek ket nagramot laeng kunana ti krimen iti nakaru a kinabartek.
Nupay kasta, iti nasao nga insidente ket nangparnuay ti sakit ti nakem iti pamilya ti biktima isunga dagus da nga indatag ti kaso maikontra iti suspek.
Kinapudno na segun kenni Maj. Antonio, naidatagen ti kaso a homicide maikontra iti suspek.
