LA UNION – Burburtia para iti pulisya ti napasamak a panangpapatay ti mister iti uneg ti balayna idiay Barangay Poro, syudad ti San Fernando, La Union.
Nabigbig ti 42-anyos a biktima a ni Christopher Costales, residente ti nasao a lugar.
Naammuan ti Bombo Radyo nga agarup alas-10:oo itattay bigat kabayatan iti panangdalapos iti bagyo Jolina idi a masarakan dagiti annakna ti biktima a nakadasay ken kadardara ti bagi daytoy iti uneg ti nadakamat a balay.
Base iti inisyal nga imbestigasyon ti San Fernando City Police Office, posible a pinang-or ti saan pay a nabigbig a suspek babaen ti natangken a banag iti rupa ti biktima a nagbanag iti pannakatay daytoy.
Arigna a maikkat iti matana ti biktima gapu ti kinapigsa iti panangmalo ti rupana.
Agtultuloy iti imbestigasyon ti pulisya tapno maammuan iti pakabigbigan ti suspek.
