LA UNION – Posible nga ‘inside job’ wenno adda met laeng kadagiti mangmangged iti responsable iti pannakapukaw ti kwarta a napaglakuan ti Monteray Meatshop idiay ili ti Naguilian, La Union.
Iti pannakiuman ti Bombo Radyo kenni Maj. Judy Calica, hepe ti Naguilian Police Station, kinunana nga awan ti pangilasinan a pwerasaan a sinerrek ti agtatakaw ti nasao a pagtagilakuan iti karne base ti agparparang iti naisayangkat nga imbestigasyon.
Sakbay a nakagteng dagiti otoridad iti meat shop idi nga impakaammo kadakuada ti dua a kahera daytoy ket nalinisanen ti nadakamat a pasdek.
Sigun kenni Calica, mapukpukaw iti aganay P37,000 cash a napaglakuan ken saan pay a nasarakan ti padlock daytoy.
Base iti kinuna ti maysa kadagiti key handler, nasangpetanna laengen nga awanan ti padlock iti ruangan ti pagtagilakuan isu a simrek laengen daytoy tapno agdalus kasaruno iti pannakaduktal ti kahera nga awanen ti nasao a kantidad.
Kabayatanna, sigun kenni Calica dua laeng nga empleyado ti meat shop iti nakaiggem iti tulbek ken madama maipaspasidong dagitoy iti imbestigasyon.
