Imbasura ti Korte Suprema iti ‘Very Urgent Motion’ nga impasa da Senador Bato Dela Rosa ken sigud a Presidente Rodrigo Roa Duterte mainaig iti maipagarop nga ‘arrest warrant’ nga impaulog ti International Criminal Court (ICC).
Iti naangay nga En Banc Session, saan nga pinaboran ti korte iti kiddaw dagiti petitioners idi Nobiembre 12.
Partikular a kiniddaw da a bilinen ti korte ni Ombudsman Jesus Crispin ‘Boying’ Remulla nga iruar wenno ipakita iti kopya ti ‘arrest warrant’ manipud ti International Criminal Court kasaruno iti panangibutaktak na.
Mainaig ditoy ket imbilin met ti Korte Suprema iti Department of Justice, Department of Foreign Affairs, ken dadduma pay a respondents nga isubmitir iti komentoda iti uneg ti sangapulo nga aldaw iti nagsina a ‘Very Urgent Manifestation’ dagiti petitioner.
Saan pay met nga inaksionan ti Supreme Court iti immunan a petision da Senador Bato ken sigud a Presidente Duterte maipanggep iti panakitinnulong ti gobierno iti ICC. #
