LA UNION – Natay iti maysa a motorcycle rider kalpasan a kinugtaran ti baka, naipurwak ken naidungpar pay iti trailer truck.
Napasamak ti aksidente iti kawatiwatan ti national higway, sakop ti Barangay Baccuit Sur, Bauang, La Union agarop alas 4:40 ti malem idi Domingo.
Nabigbig iti biktima a nagmaneho ti motorsiklo a ni Christopher Calica, 51, residente ti Barangay Natividad, Naguilian, La Union.
Maibasar iti report, iti motorsiklo nga adda iti outer lane ken trailer truck nga adda iti inner lane ket agpada nga agturong iti abagatan a direksiyon.
Dua met a saan a nabigbig a lallaki a mangguy-guyod iti maysa a baka nga agpa-abagatan iti magmagna iti outer lane.
Idi mabatugan ni Calica iti dua a lallaki iti outerlane ket kellaat a nagbuwatit ti iggem dagitoy a baka, ket nakugtaran na iti motorsiklo ti biktima.
Naipurwak ni Calica ken naidungpar iti trailer truck nga adda iti inner lane.
Nagsagaba ti pannakadun-dunor iti biktima ket naiturong iti Ilocos Training and Regional Medical Center (ITRMC) ditoy siyudad ti San Fernando para iti pannakataming daytoy.
Ngem bayat a matam-taming iti ospital, maipagarop a narigatan nga umanges iti biktima agingga a nauyusan ti biag.
Kabayatanna, iti akin-taraken ti baka ket adda sung-sungbatan na a kaso sibil bayat a ti truck driver ket posible a sumango iti kaso a reckless imprudence resulting to homicide, segun kenni Pol. Cpl. Rey Ofiaza ti Bauang Police Station.
