LA UNION – Natay iti maysa a motorcyle rider kalpasan a naaksidente iti minaneho na a motorsiklo agarop alas 12:25 idi tengngat rabii, iti kawatiwatan ti bypass road, Barangay Sevilla, San Fernando City, La Union.
Nabigbig iti biktima a ni Christian Paul Bautista, 23-anyos, residente ti Purok 2, Barangay Sevilla ditoy syudad.
Base iti report ti San Fernando City Police Station, agturturong iti amianan a direksiyon ti motorsiklo idi maipagarop a napukaw ti driver ti kontrol na iti manibela.
Kas resulta, simmalpot ti motorsiklo iti landok nga alad ti maysa a balay, partikular iti kannawan a ngalay ti kalsada.
Nagsagaba ni Bautista iti nakaru a pannakadun-dunor partikular iti ulo nangruna ket saan a nakasuot ti helmet.
Dagus a naiturong ti biktima iti Ilocos Training and Regional Medical Center (ITRMC) tapno maagasan ngem kalpasan ti sumagmamano a kanito ket indeklara ti attending physician a natayen iti pasyente.
