LA UNION – Isagsaganan ti pulisya iti kaso kontra ti driver iti kotse a nakadungpar iti motorcycle rider idiay kawatiwatan ti Aspiras Highway idiay Barangay Tabora, ili ti Pugo, La Union.
Nabigbig ti respondent driver a ni Melvin Obillo, 31, residente iti ili ti Tubao, La Union.
Base iti imbestigasyon ti Pugo Police, maipagarup a nadalapus ti kotse ti sarsarunnuenna a motorsiklo a manmanihuen ti 38-anyos a ni Fernando Quillo a taga Tubao, La Union.
Gapu iti kinapigsa ti pannakadungpar ti biktima ket naglak-am daytoy iti nakaro a sugat ti bagina nga isu ti makagapu iti pannakatayna.
Kabayatanna, simmuko met laeng idiay police station ni Obillo ken naduktalan nga awanan daytoy iti driver’s license.
